كنشوف الناس في المجموعات والصفحات فرحانين بأنترنيت الجيل الخامس 5G اللي بدات شركات الإتصال كتعلن عليها... ولكن قليل اللي عارف الحقيقة التقنية من وراها.

 

 

 كنشوف الناس في المجموعات والصفحات فرحانين بأنترنيت الجيل الخامس 5G اللي بدات شركات  x  كتعلن عليها... ولكن قليل اللي عارف الحقيقة التقنية من وراها.
قبل مندخل ليك للقالب اللي كايديرو أجي نرجعو ل لور شوية ونشرحو بعدا أشنو هي 4G وأشنو الفرق بينها وبين 5G.

 ال4G أو الجيل الرابع هي التقنية اللي كاتعطينا الأنترنت اللي كنعرفوه دابا اللي خدامة بنواة سميتها EPC إختصار ل حزمة النواة المتطورة هاد النواة هي القلب ديال الشبكة اللي كايتكلف فيها بالتسيير ديال البيانات - المصادقة - التوجيه وكلشي اللي كيدوز منو x.

 ال4G زادت السرعة بزاف مقارنة مع ال3G ولكن ما زال فيها تأخير أي Latency وما كتقدرش تربط عدد كبير بزااااف من الأجهزة في دقة وحدة.

 من ناحية الترددات ال4G في المغرب حسب التوزيع ديال ال x خدامة على النطاقات 800MHz - 1800 MHz - 2100MHz و ال2600MHz.

 أما ال5G فهو جيل جديد كليا وماشي غير في السرعة ولكن نظام جديد من الجذر. ال5G الحقيقية كتخدم بنواة جديدة إسمها 5GC – 5G Core وهاد النواة متطورة بزاف اللي كتسمح بتقسيم الشبكة network slicing باش كل نوع من الخدمة عندو مسار خاص وكتخدم بسرعة خرافية اللي كتقدر توصل حتال 10 جيجا أو أكثر... وكتعطي إستجابة شبه فورية يعني Latency قريب للصفر وكتقدر تربط آلاف الأجهزة في المتر الواحد.

 الترددات المخصصة للجيل الخامس في المغرب هي 700 MHz ونطاق 3.4 – 3.8GHz واللي فعلا x حرراتهم في 2025 باش يستاعملوهم شركات x وهاد الترددات خاصها تجهيزات جديدة - أبراج محدثة - وأنظمة وسيرڤرات متوافقة مع ال5GC.

 ولكن القالب اللي واقع دابا في المغرب ومعظم الدول كايديروه حتى هما في البدية وهو أنه ما زال ما داروش هاد الإنتقال الكامل ل5G يعني 5G الحقيقية بالبنية التحتية ديالها مزال مكاينة في المغرب.
يعني الشركات بقات خدامة بنفس البنية القديمة ديال ال4G EPC ولكن زادت فوقها 5G بطريقة سميتها NSA إختصار لNon-Standalone.

 يعني ببساطة ال5G NSA ديال دابا راها خدامة فوق ال4G ما تبدل لا القلب ديال الشبكة لا السيرڤرات لا والو غير تزادت طبقة جديدة باش الهاتف يشوف 5G.

 والحيلة التقنية اللي كاتخلي هاد الشي يبان بحال 5G حقيقية وهي نظام سميتو DSS اللي هو إختصار لDynamic Spectrum Sharing اللي كايسمح ليهم يقسمو نفس التردد مثلا في النطاق ديال 2100MHz بين 4G و 5G اللي في اللخر الهاتف ديالك يشوف 5G.

 أما 5G الحقيقية اللي كاينة في الدول المتقدمة فهي اللي كتخدم بالنظام Standalone اللي فيها نواة جديدة 5GC اللي كتعني تجهيزات جديدة - أبراج محدثة - وترددات مخصصة.
هاديك اللي فعلا كتعطي التجربة ديال الجيل الخامس بالسرعة كبيرة بزاف وتأخير شبه منعدم وقدرة تربط بزااااف ديال الأجهزة فدقة وحدة.
يعني بإختصار اللي عندنا دابا ماشي 5G ديال بالصح راه بل غير 4G متطورة شوية كتخدم بنفس القلب القديم.

 إذن حتى تبدل الشركات النواة وتولي الشبكة Standalone عاد ديك الساعة نقدرو نقولو عليها راها 5G حقيقية، وهادشي مغادي إوقع حتى دوز عامين على مقالت x في واحد التقرير ديالها.
{+} غادي تسولني ولكن راه تزادت السرعة واخا بقات في البنية التحتية ديال 4G 🙂
غادي نقول ليك عادي حيت راه واخا عليها راه إقدرو إكونو زادو تحسينات مهمة مقارنة مع 4G 

 العادية من بينها :
▪ تقنيات الإرسال الجديدة :
ال5G NSA كتستعمل أنظمة إرسال متقدمة بحال الMassive MIMO اللي هي هوائيات متعددة وتقنية الBeamforming اللي كتركز الإشارة مباشرة نحو الجهاز وهادشي كايخلي الإشارة أقوى والسرعة أحسن.

 ▪ آستعمال نطاقات أوسع :
ممكن أن الشركات زادو في الBandwidth أكبر بحال 70 MHz أو 120 MHz مقارنة مع الLTE اللي كانت كتخدم في ال20 MHz أو 40 MHz وهاد التوسيع كايخلي كمية البيانات اللي كتدوز أكبر بزاف.

 ▪ تحديث الEPC :
حتى إلى متبدلاتش النواة كليا راه الشركات ممكن أنهم دارو Upgrades في الEPC باش تواكب التحسينات الجديدة وهادشي قلل شوية في Latency وحسن التوجيه.
لهذا حتى في ال5G NSA ممكن تلاحظ فرق في السرعة والإستقرار مقارنة بال4G القديمة ولكنها ما زال بعيـــــدة على الأداء ديال 5G الحقيقية اللي كتكون Standalone أي 5G SA بالبنية التحتية الكاملة ديالها.

 
والشركات شراو طيف ترددي اللي هو المجال ديال الموجات اللي كتخدم فيه شبكات الإتصال واللي كانو هادو هما الأثمنة ديالو :
▪ شركة إتصلات المغرب : خلصات حوالي 900 مليون درهم باش تاخد 120MHz من الطيف.
▪ شركة أورنج : خلصات 600 مليون درهم على 70MHz.
▪ شركة إنوي : حتى هي 600 مليون درهم على 70MHz.
والمجموع العام في هادشي تقريبا 2.1 مليار درهم، والمخطط العام كايتوقع إستثمار اللي كايفوق 80 مليار درهم في البنية التحتية ديال ال5G على مدى العشر سنين الجاية.

 الشركات كتشري الطيف الترددي اللي هو بحال طريق في الهوا وكل وحدة كتاخد عرض معين باش تدوز فيه الإشارة ديالها وباش تفهم مزيان شنو كايعني 70MHz في السياق ديال الطيف الترددي ديال 5G خليني نشرحها ليك :
فاش كانقولو شركة بحال Orange خدات 70MHz فهذا كايعني أنه هو العرض ديال موجة الراديو اللي خصصتها ليها الدولة باش تخدم فيها الإشارة ديال 5G.

تخيل هاد الطيف الترددي بحال لوطوروت وكل شركة عندها مسار "voie" خاص بيها اللي عندو 70MHz عندو طريق بعرض 70 ميغاهرتز واللي عندو 120MHz عندو طريق عريضة أكثر ويقدر يدوز فيها عدد كبير ديال الطوموبيلات اللي في الحالة ديالنا هما البيانات وكلما كان العرض ديال الطيف أكبر كلما كانت الشركة تقدر تعطي سرعة أنترنت أعلى وعدد مستخدمين أكثر بلا ما تطيح الجودة.

 لهذا مثلا شركة إتصلات المغرب عندها Bandwidth أكبر 120MHz في النظرية تقدر تعطي أداء أفضل من شركة Inwi أو Orange اللي عندهم غير 70MHz ولكن بشرط اللي كايضور عليه البوسط من الأول وهو تكون البنية التحتية الهوائيات والسيرڤرات إلخ... مهيأة مزيان يعني ديال 5G باش تعطينا في الأخير الجودة ديال 5G الحقيقية.